Harald Schneider

Recensiun dal cudesch da Bernhard Altermatt: «Sprache und Politik – Zweisprachigkeit und Geschichte»

Tesas

  • Altermatt porscha in’elavuraziun exacta da l’istorgia dal plurilinguissem en la regiun dal chantun Friburg ed en Svizra
  • Cumparegliaziuns davart il tractament dal plurilinguissem tranter pajais e chantuns pon er purtar novas enconuschientschas per il chantun Grischun.
  • La Svizra ed er il chantun Grischun èn be parzialmain valabels sco model en contact cun il plurilinguissem.
  • L’instrucziun d’immersiun po esser in bun instrument per il manteniment e la promoziun dal plurilinguissem, n’è dentant betg in med universal.
  • En Svizra regia ina tema da la germanisaziun latenta.

 

Bernhard Altermatt, Sprache und Politik – Zweisprachigkeit und Geschichte. Die Schweiz als mehrsprachiger Bundesstaat und der zweisprachige Kanton Freiburg vom 19. ins 21. Jahrhundert, Freiburg: Kultur Natur Deutschfreiburg, 2018, 375 paginas.

 

Las forzas da la preschenta publicaziun èn: dumondas interessantas, la structura survesaivla, l’elavuraziun istorica conscienziusa e cumpetenta sco er la lingua clera. Il lectur vegn menà senza blers pleds tar la tematica centrala. L’autur na zuppa betg sia vaira motivaziun resp. sia perschuasiun. Altermatt è in proponent dals friburgais germanofons e sco tal intrinsicamain interessà per ina solida descripziun ed elavuraziun da la dumonda centrala da la discriminaziun da la minoritad linguistica dals germanofons. Il fil cotschen dal cudesch sa lascha definir suandantamain: Stentas dals friburgais germanofons per renconuschientscha en la politica linguistica sin il champ da tensiun d’ina francofonia (dominanta) e da la tema da la germanisaziun. Quai vegn persequità en moda consequenta e perschuadenta. La lectura dal cudesch en discussiun è in grond gudogn. La publicaziun d’Altermatt è ina contribuziun impurtanta per il bilinguissem en il chantun da Friburg. Quella stima na vegn er betg smesada dals puncts critics numnads en la discussiun detagliada.

Mehrsprachigkeit Graubünden