Festival "Lettere dalla Svizzera alla Valposchiavo"

In festival cumpletta­main deditgà a la producziun litterara svizra en las quatter linguas naziunalas. Intervista cun Begoña Feijoó Fariña, la manadra artistica dal festival.

En questa intervista discurra Begoña Feijoó Fariña, la manadra artistica dal festival Lettere dalla Svizzera alla Valposchiavo, davart il context, en il qual il project d’in festival deditgà a la producziun litterara da la Svizra en las quatter linguas naziunalas è naschì. Ella raquinta davart sias finamiras e davart la plivalur da l’occurrenza en l’unic chantun triling da la Svizra.

L’eveniment ha lieu per l’emprima giada dal 1. fin als 3 d’october 2021 en il Puschlav, en il Grischun talian, cun in program che metta sin tribuna enconuschentas persunalitads da la scena litterara da la Svizra plurilingua.

Il festival na duai betg be manar l’attenziun sin la ritgezza da la plurilinguitad naziunala, dentant era far or da la val in lieu d’inscunter da las linguas naziunalas, per mussar ch’in barat saja era pussaivel senza ina chapientscha vicendaivla cumpletta e senza ina lingua franca. En quest senn po la litteratura servir sco punt.

  • La finamira principala dal festival è da manar l’attenziun sin la valur da la plurilinguitad naziunala, betg sco defensiun da las minoritads linguisticas, mabain cun in accent sin la ritgezza che la varietad represchenta.
  • In festival da la plurilinguitad en l’unic chantun triling - che dat alloschi a la gronda part da questa ritgezza - vul metter en il center la ritgezza culturala e la far enconuschenta.
  • Ils inscunters han lieu il medem mument en pliras linguas e mintga occurrenza vegn tegnida en duas linguas en ina maschaida che correspunda al spiert ed a las finamiras dal festival.
  • Il festival ha en ina mira ina plurilinguitad che surpassa ils cunfins svizzers cun envidar al program mintg’onn almain in autur u in’autura che ha vivì in viadi da la lingua materna a la lingua ospitanta.

 

Mehrsprachigkeit Graubünden