Plattafurma  pluriling-gr.ch

Lai da Rims, Val Müstair (Foto M. Gustin)

Istorgia ed impurtanza da la plurilinguitad grischuna

Il chantun Grischun sa declera sco chantun triling e vegn percepì sco tal era da l'exteriur. Ma co è questa trilinguitad sa sviluppada? Co èn las relaziuns tranter las trais gruppas linguisticas sa midadas en il decurs dal temp? Co influenzava ed influenzescha la trilinguitad ils individis, las gruppas socialas, la politica, la religiun, las scolas e la legislaziun? E betg sco davos la dumonda: È la populaziun vairamain trilingua? N’èsi oz betg plitost da partir dad in continuum da monolinguitad individuala fin plurilinguitad?

 

Intgins dals temas menziunads sura èn vegnids discutads en il decurs da la perscrutaziun. Per auters mancan analisas actualas. En mintga cas exista il basegn d’infurmaziun e da discussiun. La Scola auta da pedagogia dal Grischun(SAPGR) e l'Institut per la perscrutaziun da la cultura grischuna (ikg) vulan sclerir il tema da la plurilinguitad grischuna en sias dimensiuns multifaras e metter en discussiun las diversas contribuziuns publitgadas en maniera digitala sin ina plattafurma d’internet.

La plattafurma online pluriling-gr.ch tracta divers aspects da la plurilinguitad. Entant che intgins artitgels pon sa sviluppar a basa d'ina presavida gia existenta, dumonda l’elavuraziun dad autras contribuziuns ina lavur da perscrutaziun fundamentala. Ina publicaziun online attractiva, che sa drizza ad ina vast public, pretenda en general criteris da preschentaziun specifics, tenor ils quals las contribuziuns duain vegnir preparadas per la publicaziun. Uschia vegn a nascher en il decurs dal temp ina rimnada d'artitgels bain fundads ed averts a la discussiun publica.

 

Il project ha l’intenziun da svegliar ina chapientscha approfundada per la plurilinguitad en il Grischun, da demussar lur ragischs e la cumplexitad da la relaziun tranter ed entaifer las gruppas linguisticas. En spezial duain era vegnir tematisads problematicas e svilups pli novs. Cunquai furnescha il project era material che gida a persunas interessadas da la politica, cultura, educaziun, scola, administraziun e.u.v. da relevar dumondas betg scleridas, d'intermediar tranter las gruppas linguisticas e da promover la chapientscha per l’atgna identitad e per quella dad auters.

Mehrsprachigkeit Graubünden